LAOAG CITY – Nasken a maipisok met iti freezer ti natiliw nga Lebanese suspect a nangpapatay kienni Joanna Demafelis idiay pagilian a Kuwait.
Daytoy ti reaksyon ni Prima Fernandez, maysa nga overseas Filipino worker idiay Taiwan ken tubo ti Isabela iti ekslusibo a pannakiuman ti Bombo Radyo Laoag.
Kuna na a nasken a maipan iti freezer ni Nader Essam Essaf tapno marikna na met ti sakit a pinasar ni Demafelis.
Nupay saan nga am-ammo ni Fernandez ti biktima a Pinay ket nasken a matiliw pay ti asawa ti suspek a ni Mona Hassoun a maysa nga Syrian national.
Mainaig iti daytoy, inburay ni Fernandez ti napasar na idiay Dubai a dandani a rinames ti amo na gapu ti kellaat panagserrek iti kuarto na.
Maipalagip a kalikagum a maipalawa ti sakop ti deployment ban iti sabsabali a pagilian no sadino nga adda dagiti madangdangran nga OFWs.
