LAOAG CITY – Sinuspenso ti maysa a tawen ti Japan Boxing Commission (JBC) ni Pinoy boxer John Riel Casimero.
Naipataw iti nasao a pannusa iti dati a three-division champion kalpasan a napaay a magun-od daytoy ti umiso a timbang iti labanna ken ni Saul Sanchez.
Iti nasao a laban ket addaan laeng ti limit a 122-pound para iti super bantamweight ngem limmabes ti maysa a kilo ti timbang ni Casimero.
Kas proseso ket naikkan isuna ti dua nga oras tapno maikkat ti sobra a timbang ngem saan latta a nagbaliw.
Inbatad ni Tsuyoshi Yasukochi ti JBC official a basar iti ruling-da ket mapawilan a makalaban ni Casimero ti Japan ti maysa a tawen.
Maipalagip a ti nasao a laban ket pinabagsak ti Pinoy boxer ni Sanchez iti uneg laeng ti maysa a round.
Addaan ti rekord ni Casimero a 34 a panangabak, uppat a pannakaabak ken maysa a draw nga addaan ti 23 knockouts.
