LAOAG CITY – Intandudo ti liderato ti Kamara de Representantes ti nagtitipon nga imbestigasion dagiti uppat a komite a mainaig iti illegal operation ti Philippine Offshore Gaming Operators (POGO) ken dagiti mainaig a krimen, panaglako iti illegal a droga, ken war on drugs campaign ti administrasion ni Duterte.
Daytoy nga addang ket inisiatiba ni Senior Deputy Speaker ken Pampanga 3rd District Rep. Aurelio “Dong” Gonzales Jr., a nangipaay iti pribilehio a palawag tapno mapagtitipon dagiti agsina nga imbestigasion dagiti komite kalpasan a nammoan nga agkakadua dagitoy.
Inpila ni Rep. Joel Chua ti Manila ken ni Rep. Patrick Michael Vargas ti House Resolution No. 1843 a mangisingasing nga agkaykaysa dagiti imbestigasion dagiti tallo a komite – Dangerous drug, Public order and safety, ken Human rights.
Insingasing ni Rep. Gerville Luistro ti Batangas a pagsasaritaan ti plenario ti resolusion a pakairamanan ti committee on Public accounts iti joint investigation.
Mainaig iti daytoy ti privilege speech ni Gonzales, Resolution No. 1843, ket naipatulod iti Rules committee nga indauluan ni Majority Leader Manuel Jose Dalipe para iti maitutop a panagtignay.
Kinuna ni Gonzales nga iti agdama ket sangsanguen ti pagilian dagiti isyu mainaig iti public order, proliferation of illegal drugs, ken human rights violations.
Iti sabali a bangir, rinugian ti committee on human rights ti hearing maipapan iti extrajudicial killings ken ti pannakalabsing ti human rights a nainaig iti kampania kontra droga ti administrasion ni Duterte.
Kabayatanna, ti privilege speech ni Alliance of Concerned Teachers Party-list Rep. France Castro ken Resolution No. 14 nga inpila ni Kabataan Rep. Raoul Danniel Manuel ti rason ti imbestigasion ti human rights panel.
