LAOAG CITY – Manamnama a maiyuswat ti Joint Public Hearing ti Laoag City Public Market and Commercial Complex.
Daytoy ket kalpasan nga indiaya ni Sangguniang Panlungsod Member Atty. Jason Perera nga aggiddan ti public hearing pakaseknan kadagiti peke a makan ken agas a mailaklako ditoy siudad.
Segun kenkuana, pakairamanan ti pannakaisayangkat ti public hearing and consultation mainaig kadagiti mapaspasaran a parikot ken arungaing dagiti aglaklako iti nasao a merkado publiko.
Inbatadna a posible a maiyuswat ti nasao a public hearing and consultation inton maudi a lawas ti Setiembre kas maibasar ti napagtutulaganda kadagiti maseknan nga aglaklako iti tiendaan.
Inlawlawagna a napanunutan daytoy ti konseho tapno maminpinsan ti pannakaidasar kadagiti amin a banag nangruna ket umabot iti 1,503 dagiti aglaklako iti sari-sari store, drugstore ken super market ditoy siudad.
Mainaig iti daytoy, kuna ni Sangguniang Panlungsod Member Bryan Alcid, babaen iti pannakaiyuswat ti joint hearing ket dagiti pay laeng adda mismo iti Laoag City Public Market and Commercial Complex ti umuna a dumalan iti public hearing and consultation.
Kabayatanna, naammoan nga aniaman ti mapagnunumoan ket maikkanto met ti kopya dagiti adda iti ruar ti merkado publiko.
