LAOAG CITY – Inbatad ni Jailwarden Edietor Guiang a kaadoan paylaeng a kaso dagiti maipispisok iti Ilocos Norte Provincial Jail ket gapu iti illegal a droga.
Inpakaammo na nga idi laeng Setyembre ita a tawen ket adda dagiti lima a balud nga agpapada a sumangsango ti kaso mainaig iti illegal a droga ti naibiyahe a naipan iti New Bilibid Prison.
Segun ken ni Guiang, adda ti 148 dagiti agdama a nakabalud iti Ilocos Norte Provincial Jail no sadinno nga 60 kadakuada ket sumangsango ti kaso a panaglabsing ti Republic Act 9165 weno Comprehensive Dangerous Drugs Act of 2002; idinto a dagiti dadduma ket panagrames, homicide ken estafa.
Mainaig iti daytoy, inpasigurado ni Guiang nga awan ti problema iti uneg ti pagbaludan gapu ta naiget ti panagmonitor da.
