LAOAG CITY – Arigna amin a mangabak a Barangay ken Sangguniang Kabataan (SK) officials ket maiproklamar a mismo iti kaaldawan ti eleksyon.
Inrakurak ni Commission on Elections Chairman George Garcia a ti proklamasyon ket alas-9 ti rabii intono Oktubre 30 ita a tawen.
Inpakaammo ni Garcia a kadagiti lugar nga automated elections ket nasapsapa a maiyuswat ti proklamasyon no sadinno a mabalin da nga iproklamaren dagiti nangabak iti oras ti alas 6 ti rabii.
Karaman kadagiti barangay nga addaan ti automated elections iti Barangay ken Sang Kabataang Elections ket iti Dasmariñas, Cavite ken Pasong Tamo iti Quezon City.
Ti panagbotos iti Metro Manila, Legazpi, ken Cebu ket maiyuswat kadagiti 11 a malls.
Inaprubaran pay ti Commission on Elections ti resolusyon a mangipalubos iti suspensyon ti proklamasyon kadagiti mangabak a kandidato no saan pay a nasolbar ti sangsangwen da a kasosakbay ti kaaldawan ti eleksyon.
Inpetteng ni Garcia nga amin a nakapenpen a kaso dagiti kandidato ket masolbar iti uneg ti dua a lawas kalpasan ti eleksyon intono Oktubre 30.
Madiskwalipikar met iti sisyon ti maysa a kandidato a mapaneknekan nga addaan ti election offense.
Kabayatanna, inrakurak pay ni Garcia a maysa laeng iti dua nga eleksyon intono 2025 ti automated.
Maiyuswat ti midterm national elections intono May 2025 ken Barangay ken Sang Kabataang elections iti Disyembre 2025. Inbatad ni Garcia nga inaprubaran ti Kongreso ti P22 bilyon para iti Barangay ken Sangguniang Kabataan Elections (BSKE).
