LAOAG CITY – Inpakaammo ni Fr. Randy Manicap, pannakangiwat ti Kaammoyo ti Kappia a saan nga agsardeng ti panawaganda a maituloy ti impeachment trial kontra ken ni Vice President Sara Duterte iti baet ti panang-archive ti Senado.
Inlawlawagna nga agingga a saan a matuloy ti pannakaiwayat ti impeachment trial kontra iti Bise Presidente ket agtultuloy a saan a malawlawagan ti panunot ti naruay nga umili maipanggep kadagiti reklamo a naipila kenkuana kas ti maipagarup a saan nga husto a pannakausar ti confidential funds iti Office of the Vice President.
Inbatadna a nakapatpateg no ipursige iti pannakaiwayat ti impeachment trial gapu ta daytoy ti agbalin a wagas tapno mapaneknekan nga awan ti basol ti Bise Presidente ken maammoan ti kaaduan ti kinapudno.
Innayonna nga agingga a saan a rummuar ti kinapudno ket agtalinaed ti adu ken dakkel a saludsod kadagiti naruay a Pilipino.
Kabayatanna, mamati ti pannakangiwat ti Kaammoyo ti Kappia nga adda ti maris pulitikana ti nagbalin a desision ti Senado gapu ta kaaduan kadagitoy ket pimmabor iti panang-archive ti impeachment case kontra ken ni Vice President Duterte.
