LAOAG CITY – Inbatad ni Atty. Gerald Gallardo, ti Provincial Director ti Department of Interior and Local Government ditoy probinsya a masapol a masolbar a dagus ti kaawan dagiti nagpila ti Certificate of Candidacy na a para Sang Kabataang Kagawad ken Sang Kabataang Chairperson.
Inlawlawag ni Gallardo nga al-alisto a solbaren no awan ti nagpila ti sertipikasyon na a para Sang Kabataang Chairperson ngem adda dagiti agpaidasig a para Sang Kabataang kagawad.
Kuna na a basar iti panagannurutan, no siasino ti mabotosan nga umuna kas Sang Kabataang kagawad ket isuno ti maipatugaw kas Sang Kabataang Chairperson.
Segun ken ni Gallardo, apaman a makaasumer ti agtugaw kas Sang Kabataang Chairperson ket i-convene nanto dagiti miembro na nga agtawen ti 15 agingga iti 30 tapno mangiyuswat da ti special elections ken mangbotos da ti maysa pay a Sang Kabataang kagawad a manglitop iti nabakantean a pwesto.
Mainaig iti daytoy, inpakaammo ni Gallardo a no ti laeng nagpila ti sertipikasyon na ket ti para Sang Kabataang Chairperson, apaman nga agasumer iti pwesto ket i-convene na metlaeng dagiti miembro na para iti pannakaiyuswat ti special elections tapno mangbotos da ti pito nga agtugaw kas Sang Kabataang kagawad.
Innayon na a ti pannakaiyuswat ti special elections ket ikoordinar da iti Department of the Interior and Local Government ken Commission on Elections.
Kabayatanna, inpalgak ni Gallardo a no awan pulos ti kandidato iti Sang Kabataang Chairperson ken Sang Kabataang kagawad iti maysa a barangay ket pagnunumoan danto ti kasayaatan a maaramid kalpasan ti eleksyon.
Immuna iti daytoy, inpaganetget ni Gallardo a dakkel ti epekto na no awan pulos ti mabotosan nga opisyal ti Sang kabataan gapu ta ma-delay amin ti pannakaiyimplementar dagiti proyekto.
