LAOAG CITY – Kinumpirmaran ni Engr. Cynthia Iglesia iti DOST-PAG-ASA ti Laoag International Airport a nairekord ita nga aldaw Enero 12 ti kababaan a temperatura ditoy Ilocos Norte sipod simrek ti tawen 2022 nga umabot iti 17.6 degrees celsius.
Segun kenkuana, gapu iti daytoy ket makarikna ti nalamiis a paniempo dagiti kakailian iti daytoy nga aldaw nangnangruna kadagiti agnanaed iti paset ti kabanbantayan wenno asideg iti kabaybayan.
Inbatadna nga adda pay ti epektona iti agdama a marikrikna a klima iti napasaran a panagtudona idi kalman a nangpalamiis iti aglawlaw ditoy probinsia.
Kunana a posible a nabara iti daga idinto a nalamiis iti baybay rason nga adda ti nabukel a thunder clouds a nangitunda ti panagtudona.
Innayonna a manamnana nga adu dagiti makarikna ti uyek ken panateng gapu iti kinalamiis ti panawen.
