LAOAG CITY – Nagbalin nga inspirasion ni Dr. Loida Valenzuela ti pannakatay ti maysa kadagiti kabagianna gapu iti rabies tapno agbalin a veterinarian iti masakbayan.
Gapu iti daytoy, ad-adda a nakarikna ti gagar isuna a mangala ti kurso nga adda ti pakainaiganna iti beterinario apaman a nakatapog daytoy iti kolehio iti University of the Philippines.
Malaksid iti daytoy, inpakaammona nga ubing pay laeng isuna ket kaay-ayonan ti agpakan kadagiti nagduduma a klase ti ayup a makaipaay ti liwliwa kenkuana.
Inlawlawagna nga iti kinapudnona ket agsupadi ti kayatna nga alaen a kurso idi kolehio iti kalikagum dagiti nagannak kenkuana.
Mainaig iti daytoy, segun ken ni Valenzuela a naidumduma ti dakkel a karit kadakuada kas maysa a veterinarian gapu ta saan a makasarita dagiti ayup no ania ti sagsagabaenna a sakit maidasig kadagiti tattao a maibagada no ania ti rikriknaenda a sakit.
Inbatadna a pinadasna pay ti nagaplikar iti Department of Agriculture ken iti Mariano Marcos State University.
Kunana a malaksid iti panagbalin a veterinarian ket immuna a kalikagumna nga agbalin kas maysa a nurse.
Naammoan a dagiti kabsat ni Dr. Valenzuela ket maysa a Certified Public Accountant, Mechanical Engineer ken Electrical Engineer.
Innayonna a ti gagemna sakbay a naan-anay nga agretiro iti serbisio ti gobierno ket maipababa ti kaso ti rabies iti intero a probinsia ti Ilocos Norte.
Kabayatanna, nangibati ti agdama a Provincial Veterinarian ti maysa a mensahe para kadagiti napnoan ti arapaap nga agpokus ti kalikagum nga aramiden iti biag sangapulo a tawen manipud ita.
