LAOAG CITY – Nakigtot dagiti kakabagian ni Atty. Oliver Lozano iti Bgy. Madamba iti ili ti Dingras kalpasan a naamuan da a pimmusayen daytoy idiay Manila.
Segun kada Gloria Tamayo Mariano ikit ti Abogado ken ni Rebecca Ballesteros, caretaker iti pagtaengan ti Abogado, ditoy pay laeng Bombo Radyo ti nakaamuan da a pimmusayen daytoy.
Kunada a naruay dagiti saan da a malipatan kas iti no agbakasyon kas iti Disyembre ket ummungen na amin a kakabagian na ket mangted ti regalo.
Ibilang da a “fighter”, humble ken Mr. impeachment.
Inlawlawag da a naudi a panagbakasyon na ket itay napalabas a bulan ti Marso ngem saan a nagbayag.
Segun ken ni Mariano, saan na a patien a maiyawid ken maitabon ti bangkay ti Abogado iti ili ti Dingras gapu ta patien na a maiyabay iti tanem ti anak na idiay Manila.
Kuna met ni Balleteros a no ana ti mandar ti pamilya na ket suruten da kas iti nakaikadawyan a panagapaluwalo.
Pinanawan ni Lozano ti asawa na a ni Norma ken dagiti lima nga anak na a paspasig a professional.
Pimmusay daytoy idi kalman bayat a naitaray iti hospital gapu iti panagatake na iti tawen na a 77.
