LAOAG CITY – Nagpila ti criminal charges ti pamilya dagiti biktima ti plane crash iti South Korea kontra iti chief executive officer ti Jeju Air, transport minister ken nasurok a 10 a sabsabali pay.
Inpetteng da a dakkel ti panagbaybay-a dagiti maseknan isut gapuna a napasamak ti trahedya.
Adda ti 72 a kabagyan dagiti biktima ti nagpanawagan ti naun-uneg nga imbestigasyon iti napasamak a nakatayan ti 179 a nakalugan iti bimmagsak nga eroplano.
Inpetteng da a saan a maysa nga aksidente laeng ti trahedya no di ket maysa a major disaster a nangitunda iti kinapalpak ti management.
Maipalagip nga agarop lima a bolanen ngem agtultuloy paylaeng ti panagim-imbestigar dagiti otoridad no ania iti makaigapu ti plane crash iti Muan International Airport.
Iti agdama, napawilan a pumanaw iti pagilian ni Jeju Air CEO Kim E-bae, uray awan pay ti desisyon iti kaso na.
