LAOAG CITY– Inpeksa ni Glesie Dichoso, kaanakan ni Armand Bayudan iti Barangay Elizabeth, Marcos, Ilocos Norte ti sakit ti nakem da iti PNP gapu ti maipagarop a panangikabil da ti illegal a droga iti bulsa ti uliteg na.
Maipalagip a natay ni Bayudan kalpasan a napaltu-paltugan bayat ti panagdaldalyasat na iti Barangay Parado iti ili ti Dingras a nakalugan ti motorsiklo bayat ti panagawid na koman idiay Barangay Elizabeth.
Inlawlawag ni Dichoso a bayat ti kaadda da iti ambulansya idi mapan da ipan ni Bayudan iti ospital iti ili a Dingras ket kinapkap dan dagiti bulsa na tapno maamoan da no adda ti nabati a kwarta na.
Inpasingked na a ti laeng naala da iti bulsa na ket 62 a pisos a barya ken sangarakem a bawang, idinto a ti bag na ket naglaon laeng iti bread, embutido ken nakalata a biscuit.
Nupay kasta, kuna na nga idi addan ti bangkay ni Bayudan iti maysa a punerarya ket maipagarop nga adda ti napan a dua a pulis, kalpasan na ket inpakaammo da nga adda ti naan da a sumagmamano a sachet iti bulsa na a naglaon ti maipagarop a shabu.
Inpetteng ni Dichoso nga awan pulos ti karga ti bulsa ti uliteg nan gapu ta inikkat da amin sakbay pay a naipan iti punerarya isut gapuna a nalidem nga adda ti droga a maala dagiti pulis.
