LAOAG CITY – Maysa a nakaruk-at a kabalyo ti napan iti maysa a train station idiay Sydney, Australia ket ginandatna nga aglugan ti tren ken mangkamat kadagiti pasahero.
Nagbalin a viral kadagiti Australian netizens dagiti security camera video footage nga in-post ti Transport for New South Wales no sadinno a makita ti maysa a kabalyo a simrek iti maysa a platform ti train station iti kangitingitan ti napigsa a tudo.
Basar iti Transport for New South Wales, simrek ti kabalyo iti Warwick Farm station ket namin-adu a daras a nagtaray-taray iti platform ti istasion.
Nagsardeng ti panagtarayna idi nakitana nga adda ti sumungsungad a tren nga arig maysa a pasahero a kayatna ti aglugan iti tren.
Idi nakita ti operator ti tren ti kabalyo iti platform, saanna a linuktan ti ridaw ti tren ket pinakdaaranna dagiti pasahero nga adda kabalyo iti ruar.
Rinugian manen ti kabalyo ti nagtaray ket kinamatna ti sumangbay a pasahero a sumrek koma iti tren. Napaspas a nakalibas ti pasahero a kinamat ti kabalyo ket saan a nasugatan.
Insigida nga inayaban ti operator ti tren dagiti pulis tapno tiliwenda ti kabalyo. Kalpasan a simmungbat dagiti pulis, immay innala ti akinkukua ti kabalyo.
Naammoan a ti nasao a kabalyo ket pangkarera a nakalibas iti kuadrana.
Basar iti Transport for New South Wales, natalged a naiyawid ti kabalyo ken awan ti nangipila iti reklamo kontra iti akinkukua ti kabalyo.
