LAOAG CITY – Nauram ti kabanbantayan a paset ti Barangay Suba iti ili ti Paoay.
Segun kenni Barangay Kagawad Rey Pedro iti Barangay Suba, nangrugi ti uram iti Barangay Balacad ken nagramram iti Barangay Calayab ditoy ciudad ti Laoag agingga a nakadanon iti Barangay Suba iti ili ti Paoay.
Inbatad ni Pedro a napasamak ti uram iti tengnga ti aldaw ken naipadanon kenkuana a nanggapo ti apoy iti Barangay Balacad.
Kunana nga idi nakita dan ti apoy iti paset ti Barangay Balacad ket timmawag dan iti BFP ngem alisto a nagramram ti apoy gapo iti angin.
Innayon na nga awan met ti naapektaran a pagtaengan wenno dingwen.
