LAOAG CITY – Nauram ti kabanbantayan iti Solsona-Apayao Road iti paset ti KM Post 533, Brgy. Maananteng iti ili ti Solsona.
Daytoy ti inpakaammo ni Senior Fire Officer 1 Paul Vincent Maranan ti Bureau of Fire Protection iti ili ti Solsona.
Segun ken ni Maranan, adda ti naawatda a report nga adda ti maur-uram iti nasao a lugar rason a dagus dagitoy a napan nagresponde.
Basar iti insayangkatda nga imbestigasion, kunana adda dagiti napan nga agkaingin nga immuli iti nasao a bantay no sadino nangrugi ti uram iti oras ti alas diyes ti bigat ken naideklara a fire out daytoy iti alas onse y medya ti pangaldaw.
Mainaig iti daytoy, inbatadna nga agbalor ti agarup 50 a ribu a pisos iti panakadadael ti nauram a bantay nga addaan ti kalawa a sangapulo nga ektarya.
Nupay kasta, inlawlawagna nga awan ti naipadamag a nadangran iti nasao nga uram ken dagus met a nasebseban daytoy babaen iti panagtitinnulong dagiti kameng ti Bureau of Fire Protection iti ili ti Solsona.
Kabayatanna, nagpalagip ti Bureau of Fire Protection a liklikan ti panagpuor tapno saan a makaitunda ti nalawa ken dakkel nga uram.
