LAOAG CITY – Kinumpirmaran ni Miss Marilou Pasalo, school head iti Bingao National High School iti ili a San Nicolas a maysa kadagiti nadadael iti iduduprak ti bagyo Ompong iti nasao a pagadalan ket dagiti kabarbaro nga school buildings da nga agbalor iti 1.8 milyon a pisos.
Inlawlawag na a gapu ti pannakadadael dagitii baro nga school buildings ket sumagmamano a classrooms ti nairaman a nadadael, karaman dagiti 42 a computer set ken dadduma pay a napapateg a kagamitan ti nasao a pagadalan.
Segun ken ni Pasalo, dagiti nadadael a computer set ket agbalor iti agarop 500 a ribos a pisos.
Inbatad na a kalpasan ti bagyo ket napan da a dagus inreport ti napasamak kadagiti maseknan kangrunaan na kada DepEd Supt. Vilma Eda, Engr. Matias Malenab ken dadduma pay.
Innayon na a tinawagan a dagus ni Engr. Malenab ti contractor a ni Mr. Robert Duran ti nasao a pagadalan ket napanda nga insigida rinugyan a tinarimaan.
Gapu ti napasamak ket agklase pay laeng dagiti adalan da iti covered court ti nasao a pagadalan.
Immunan a binabalaw ni Eda ti nasao a pagadalan gapu ti saan da a panangikabil kadagiti computer sets ti school building idinto a sakbay iti idadalapos ti bagyo ket inbilin dan daytoy.
