LAOAG CITY – Maysa a Japanese toymaker company ti nakaaramid ti kabassitan a Rubik’s Cube iti intero a lubong.
Inrakurak ti kompania a MegaHouse nga available para iti pre-order ti Rubik’s Cube-da nga addaan ti 0.19 inches ti kaakaba, 0.19 inches ti kadakkel ken 0.19 inches ti kaatiddog.
Daytoy ket arig maysa a ribu a daras a nabasbassit no idasig iti orihinal. Iti kinabassitna daytoy ket masapol pay nga agusar ti tsane tapno maay-ayam daytoy.
Gapu iti kinabassitna, kinumpirmaran ti Guinness World Records idi Agosto a daytoy ti baro a record holder ti titulo a “World’s Smallest Rotating Puzzle Cube.”
Basar iti Megahouse, rinugianan ti kompania ti konseptwalisasion daytoy, addan ti uppat a tawen ti napalabas ken nangrugi ti proseso ti produksion daytoy idi 2022.
Ti pannakairuar ti kabassitan a Rubik’s Cube ket kageddan ti maika-50 nga anibersario ti orihinal a Rubik’s Cube.
