LAOAG CITY – Desidido ni Mr. Aaron Mark Estavillo, kabo ti Small Town Lottery (STL), taga Barangay 2 ditoy ciudad ti Laoag a mangipila ti reklamo kontra kadagiti tricycle driver a nangkabkabil kenkuana.
Iti eksklusibo nga interview ti Bombo Radyo Laoag ken ni Estavillo, inlawlawag na nga idi bigat ti sabado, Setyembre 28 ket napanna inbaga iti tricycle driver a Mr. ni Joel Asuncion a nangatiw ti maysa a limit a kaibatugan ti 14 a ribo a pisos ken inkari na a mapanna ipan ti inatiw na iti malem.
Nupay kasta, iti papanna koma panangala ti inatiw ni Asuncion ket naduktalan na a saanna a naipan iti bolaan ti papel a nagisuratan na ti numero, karaman ditoy ti tinayaan ni Asuncion.
Gapu iti daytoy, kinasarita na ni Asuncion ken indiaya na ti motorsiklo, helmet ken relo na pangigawid na pay laeng agingga nga awan ti pangbayad na iti inabak na gapu ta adda ti binulod na a kwarta iti am-ammo na.
Inadmitir na a kamali na ti napasamak isu a kinasarita ni Asuncion ngem ditoy metten a maipagarop a kinabkabil na ken rimmaman pay dagiti dua a pada na a tricycle driver.
Iti agdama, angalen ni Estavillo ti panagsaksakit ti barokong ken ti teltel na isu kasapulan na ti agpaagas.
Kabayatanna, inadmitir ni Asuncion a dinangran da ti kabu a ni Mr. Aaron Mark Estavillo, taga Barangay 23 ditoy ciudad ti Laoag gapu ta nakapungtot iti panangluko na kenkuana.
Inbatad na nga idi damo da ti nagsarita ken ni Estavillo ket inbaga na a mapanna laeng alaen ti inabak na ngem idi agsubli ket inbaga na a saan na a nairemit dagiti pinatayaan na.
Inpetteng na a nabayagen a saan a nangabak ti Small Town Lottery (STL) isu a maluksaw idi ibaga kenkuana ti kabo a saan na a nairemit dagiti pinatayaan na.
Malaksid ti daytoy, inbatad na a naipaala na aminen dagiti kwartana karaman ti boundary na iti ipaspasada na a tricycle gapu ta ninamnama na iti inabak na ti STL.
Inadmitir ni Asuncion a nakainom ti nasanger idi napasamak ti insidente.
Kuna pay ni Asuncion nga awan ti kinapudno na ti ibagbaga ni Estavillo a saanna a naited iti bolaan ti tinayaan na gapu ta ti maysa kadagiti kinagiddan na a nagtaya ket nangabak pay.
Mamati ni Asuncion a nagastos ni Estavillo ti inabak na iti STL, ngem nasaysayaat koma no inbaga na ti pudno ken saanna a switswitiken.
Inpakaammo na a nagsarita dan ken ni Estavillo iti biang ti barangay ket inkari na nga ited na ti inabak na ti intono biernes, Oktubre 4.
