LAOAG CITY – Natukkol ti abaga ken saka ti maysa a kabo ti STL kalpasan ti napasamak a degrasya iti Escodo road a paset ti Brgy. 18 iti ili ti Sarrat.
Ti biktima ket residente iti Brgy. 19 iti nasao nga ili ken nagiturong ti kurong-kurong.
Basar iti imbestigasyon ti PNP-Sarrat, agpadpadaya ti kurong-kurong idi ta ginandat daytoy ti nag-overtake iti nakaparking a truck iti igid ti kalsada.
Nu pay kasta, possible nga adda ti makasinnabat daytoy iti bangir a linya ti kalsada rason a dinerderetso na ti likod ti truck nga isu ti nakaidungparan ti kurong-kurong.
Gapu iti kapigsa ti impact ket nadadael ti sango a parte ti kurong-kurong ken isu ti puon ti panagsagaba ti tukkol iti abaga ken saka ti driver.
Iti agdama ket nagtalinaed iti Mariano Marcos Memorial Hospital and Medical Center iti siudad ti Batac ti driver ti kurong-kurong.
