LAOAG CITY – Inlawlawag ni Drexler Suguitan no kasanu a nakuryente a nangitunda ti pannakatay ti kabsat na a ni Duwaine Bayron Suguitan, agtawen ti 19, baro ken residente iti Brgy. Nambaran iti ili ti Bacarra.
Segun ken ni Drexler, kabayatan a mangipatpatakder da ti scaffolding a pagbatayan da nga agpinta iti likod ti simbaan iti Barangay Visaya iti ili ti Vintar ket pinalagipan ken pinagannad na ti kabsat na amangan no masagid na ti linya iti kuryente.
Kuna na a timmalikod ken idi kitaen na ti kabsat na ket isu metten ti pannaka-kuryente na a bulon na ti pannakaregreg na iti baba.
Patien ni Drexler a naisagid ti kabsat na ti ig-iggaman na a tubo iti live wire rason a nakuryente daytoy.
Innayon na nga intaray da iti Governor Roque Ablan Senior Memorial Hospital ditoy ciudad ti Laoag ngem pimmusayen ti biktima.
Naamoan a ti ina ti biktima ket maysa nga Overseas Filipino Worker (OFW) idiay Hongkong no sadinno a kasubsubli na laeng iti nasao a pagilyan idi Abril 26 ita a tawen.
Nupay kasta, gapu iti pannakatay ti anakna ket nagawid a dagus ditoy pagilyan a possible nga intono bigat ket addan iti mismo a pagtaengan da iti ili ti Bacarra.
