LAOAG CITY – Mamati ni Ms. Juvilyn Mantay, kabsat ti suspek iti naiwayat nga Anti-Illegal Drug Buy-bust Operation iti Barangay 22 San Guillermo iti ili San Nicolas a naimula dagiti nakumpiskar a maipagarup a shabu iti kabsatna.
Segun kenkuana, dakkel ti atapna a naimula laeng dagiti naala a maatap a shabu iti kabsatna gapu ta mapagdududuaan ti pannakaala ti bidyu iti operasion.
Inbatadna a nakasagana met a sangoen ti kabsatna ti maiyak-akusar kenkuana no laketdi naiwayat ti operasion iti umiso a wagas.
Inlawlawagna nga awan ti kontakda iti kabsatna isu a saanda a masinunuo ti agdama a kasasaad daytoy.
Maipalagip a natiliw ni Arwelito Mantay, agtawen iti 37, naasawaan, construction worker, residente ti Brgy. Mariquet iti ili ti Solsona ngem agdama nga agnanaed iti boarding house-na iti Brgy. 1 ditoy siudad ti Laoag ken tubo isuna idiay Davao del Sur.
Immuna iti daytoy, nakumpiskar manipud iti suspek ti maysa nga heat sealed transparent plastic sachet ti maatap a ginatang ti nagpammarang a police poseur buyer pakairamanan ti maysa pay nga heat sealed transparent plastic sachet a maipagarup a shabu ken maysa a ribu a pisos a mapapati a nausar kas buy-bust money.
