LAOAG CITY – Naartapan ti University of Maine ti bukudda a world record kalpasan a nakaaramidda ti kadakkelan a polymer 3D printer.
Idi 2019, nakaawat ti Guinness World Record ti University of Maine ti world record title a “World’s Largest 3D Printer.”
Ti nasao a printer ket naka-print ti bangka nga addaan ti kadakkel a 25 feet ken addaan ti kadagsen a 5,000 pounds.
Nupay kasta, ita a 2024, nakaaramidda ti baro ken mas high-tech a 3D printer nga uppat a daras ti kadakkelna maidasig iti immunada a printer idi 2019.
Inawagan daytoy a printer a Factory of the Future 1.0 ken kabaelanna nga ag-print ti maysa a single-storey bungalow house iti uneg laeng ti uppat nga aldaw.
Maysa kadagiti rason no apay nagaramidda ti printer ket para iti affordable housing. Ti state ti Maine ket masapol a makaaramid ti 80 a ribu a pagtaengan iti sumaruno nga innem a tawen ngem kurangda ti manpower.
Malaksid iti daytoy, tapno malappedan ti kumarkaro a climate change. Basar iti maysa a panagsukisok, ti construction industry ti maysa kadagiti mangpakpakaro iti climate change gapu ta 37 a porsiento ti greenhouse gas emissions ket aggapu iti nasao nga industria.
