LAOAG CITY – Nakagun-od ti world record ti maysa a nakadakdakkel a cheesecake a naaramid iti Lowville, New York gapu iti kinadakkelna.
Kinumpirmaran ti records keeping organization a Guinness World Records a ti kompania ti Kraft-Heinz ti baro a world record holder ti titulo a “World’s Largest Cheescake” kalpasan a nakaaramidda ti 15,008 pounds a cheesecake.
Ti nasao a cheesecake ket inaramid ti nasao a kompania para iti tinawen a Cream Cheese Festival.
Saan daytoy ti umuna a daras a nakaaramidda ti record breaking cheesecake gapu ta idi 2013 ket naawatdan ti nadakamat a Guinness title ngem naagaw daytoy kadakuada iti maysa a team ti bakers manipud idiay Russia.
Naammoan a kalpasan a kinumpirmaran ti Guinness a naagawda ti titulo, pinagsasangoan dagiti napan nagatendar ti festival ti cheesecake ken dagiti nabati ket naipaay kadagiti local food banks.
