LAOAG CITY – Idi 2013, sumurok 24 a ribu a residente ti Atlantic Canada ti nakipaset iti maysa a panagadal a gagem a duktalen ti mangitunda ti kanser ken dadduma pay a nakaro a sakit.
Daytoy a proyekto ket inmatonan ti Atlantic Partnership for Tomorrow’s Health (PATH) ket nagkalap ti sumurok 250 a ribu a pedaso dagiti kuko manipud kadagiti nakipaset nga agtawen ti 35 agingga iti 69 karaman ditoy dagiti datos kas ti body measurement ken blood sample.
Ti naidumduma a koleksion ket nagbalin a wagas tapno maawatan dagiti sientipiko no kasano a maap-apektaran dagiti environmental factor iti salun-at ti tao nangruna ket nangato ti kaso ti kanser iti Atlantic Canada.
Babaen ti panagsukisok, naduktalanda ti pakainaigan ti arsenic manipud iti kontaminado a danom ken ti panagngato dagiti kaso ti bladder ken kidney cancer iti rehion.
Malaksid iti daytoy, naduktalan met ti koneksion ti lukmeg ti bagi iti panag-absorb ti arsenic.
