LAOAG CITY – Pinaneknekan ti maysa a lalaki manipud iti Colorado a saan laeng a tsamba ti panangabakna kalpasan a magun-odna ti Guiness World Record para iti kadakkelan a trap ti Venus flytrap iti maikatlo a gundaway.
Pormal a naideklarar idi Hunio ti Venus flytrap ni Jeremiah Harris nga addaan kapuskol a 6.6 centimeters wenno 2.59 inches a katukad ti maysa ken kagudwa ti palito a posporo.
Daytoy a rukod ket maibilang a dakdakkel no ikumparar iti kadawyan a 2 agingga 3 a centimeters a kapuskol ti nasao a mula.
Lima pay laeng ti tawen ni Harris idi 1992 idi mangrugi daytoy a ma-attract kadagiti mula nga agkakaan ti insekto. Hobby pay daytoy ti panagtagikua ti nagduduma a carnivorous plants iti likod ti pagtaenganda ken maibilang kas maysa kadagiti addaan nalawa a koleksion iti intero nga Estados Unidos.
Immunan a nagun-od ni Harris ti titulo para iti kadakkelan a trap iti maysa a Venus flytrap idi 2020 nga usar ti cultivar nga amammo ti kaadoan kas ‘Alien’ nga addaan ti sukat a 5cm. Sinarunoanna daytoy nga insigida idi 2021 nga usar pay ti maysa a mula manipud iti agpada a klase ng umabot met iti 6.1 a centimeters.
