LAOAG CITY – Temporaryo a pinaserraan ti Dept. of Health idiay Isla ti Hawaii ti paktorya ti tsokalate idiay Big Island, Hawaii.
Segun ken ni Bombo International Correspondent Manny Pascua, inaramid ti nasao nga ahensiya ti nangserra ti Mauna Loa Chocolate Company gapu iti naduktalan a kontaminado ti e coli bacteria ti danum nga us-usaren da iti panagaramid ti tsokolate.
Kuna na nga agarup 21 a klase ti tsokolate ti pare-recall ti DOH a dagitoy ket naaraamid idi Sept. 5 agingga iti Sept. 21 iti daytoy a tawen.
Gapu iti daytoy, nasurok a 200 nga empleyado ti apektado ti nasao a panagserra a kaaduan kadagitoy ket Pilipino ken Ilokano.
Saan met pay nga ammo no inton kaano ti panagsubli ti operasyon na.
Naamuan nga iti asideg ti paktorya ket adda da dagiti makitkita a pagalagala a baboy ramo.
Ti e coli bacteria ket maala manipud iti rugit ti tao wenno dingnguen.
