BOMBO LAOAG – Agtultuloy a maisayangkat ti Kadiwa ni Manang Imee Paspas Takder nangnangruna kadagitoy a kalkalpas ti isasaplit ti bagyo ompong.
Nupay kasta, impalgak ni Mr. Edsison Natividad, mangidadaulo ti SME Office ti gobierno probinsial a mabalin a saan pay laeng a maipatungpal ti orihinal a plano a kaadda ti Kadiwa iti Dap-ayan ditoy siudad ti Laoag iti tunggal aldaw ti huebes ken biernes.
Inlawlawagna a daytoy ket gapu iti kalikagum ni Gob. Imee Marcos a pannakaisayangkat ti Kadiwa iti nadumaduma nga ili ken siudad ditoy probinsia kangrunaanna kadagiti lugar a nakana ti namsaakan ti bagyo ompong kas iti siudad ti Batac, Pagudpud ken Pasuquin.
Imbatadna nga idi kalman nga aldaw ti tienda ti siudad ti Batac ket isu ti panagturong ti Kadiwa iti nasao a siudad.
Nupay kasta, kunana a saan pay a masinunuo ti sumaruno a pagturungan da gapu ta kayat ti gobernador nga aggiddan ti Kadiwa ken cash for work a maiyuswat iti maysa a lugar.
Impasigurado ni Natividad a mailako iti panagsursur ti Kadiwa dagiti kangrunaan a magatgatang kas iti bagas, manteka, asukar, noodles, de lata ken dadduma pay.
