LAOAG CITY – Maisayangkat ti Kadiwa ng Pangulo ditoy Ilocos Norte ita nga aldaw ti Lunes, Hulio 17, iti sangoanan ti kapitolio probinsial.
Inbunannag ni Engr. Ma. Teresa Bacnat, Officer In-charge ti Provincial Agriculture Office a manamnama nga adda a mailako dagiti kangrunaan a magatgatang iti nalaklaka a presyo babaen iti regional office ti Departamento ti Agrikultura.
Inlawlawagna a karaman ditoy dagiti nagdumaduma a “grocery items”, manteka, bagoong, soy ken dadduma pay.
Kabayatanna, inbatadna a tapno matulungan dagiti mannalon ken dagiti babassit a negosiante ditoy probinsia a mangilako kadagiti produktoda ket naawis met dagitoy nga aglako kangrunaanna kadagiti prutas ken natnateng.
Malaksid iti daytoy, kunana nga impadanon pay ti maysa dakkel a grocery store ti kalikagumda a makipaset iti nasao nga aktibidad.
Mainaig iti daytoy, iyaw-awis ni Bacnat iti pananggundaway dagiti umili iti kaadda ti Kadiwa ng Pangulo ditoy probinsia.
Inpanamnamana nga agmalmalem ti pannakaisayangkat ti nasao nga aktibidad.
Nupay kasta, kunana a no madlawanen dagitoy nga awan ti aggatang ket mabalinen dagitoy nga ipakni dagiti tagilakoda.
