LAOAG CITY – Inlawlawag ni Barangay Kagawad Angelo Manuel iti Barangay 4 ditoy ciudad ti Laoag no apay nga awan ti agbanbantay kadagiti barikada itay parbangon.
Segun kenni Manuel, ti pay laeng sinurot da nangrugi idi kalman ket ti naipatungpal idi ummuna a nalockdown ti lugar no sadinno ket saggatlo da nga oras ti panagbantay.
Kunana a daytoy ti rason nga awan ti nagbantay itay parbangon ken nagpatingga da laeng iti alaspdose iti tengnga ti rabii.
Nupay kasta, inbatad ni Manuel nga ur-urnusen da ti schedule da nga opisyales ti barangay, dagiti tanod ken BHW tapno 24 oras nga adda ti nakabantay iti naestablisar a barikada.
Inbatad na a nakasarita da metten dagiti amin nga apektado a pamilya ken no adda ti kasapulan dagiti maseknan ket isuda nga opisyales ti mapan aggatang tapno awan ti rimwar manipud iti pagtaengan da.
Kabayatanna, kuna ni Barangay Kagawad Rubie Ann Corpuz nga agtultuloy ti maiyus-uswat a contact tracing kadagiti posible a nakapulapol ni IN-C200 ken IN-C201.
Naamoan nga idi Miyerkules ti naudi nga iseserrek ni IN-C200 iti opisina iti City Hall.
Innayon na nga umabot iti 19 a pamilya ti apektado iti lockdown.
