LAOAG CITY – Masdaaw ni Barangay Kagawad Jhun Viloria iti Barangay Duripes iti ili ti Bacarra no apay a rimwar ken napan nakimisa ni IN-C1071, maysa a babai, agtawen ti 40, residente iti Barangay 27-A, Pungto iti nasao nga ili ken maysa a maket vendor iti laksid a dimmalan daytoy iti swab test.
Ni IN-C1071 ket aglaklako iti tiendaan iti ili ti San Nicolas rason a dimmalan daytoy iti swab test.
Segun kenni Viloria, kalpasan a dimmalan iti swab test ti pasyente ket napan nakimisa idi Abril 4 iti Our Lady of Fatima iti Barangay Cadaratan iti nadakamat met laeng nga ili.
Kunana a kalpasan a rimwar ti resulta ken positibo iti virus ket nasurok 118 ti nacontact trace agraman dagiti amin a napan nakimisa.
Inlawlawag na nga apaman a dimmalan iti swab test na-contact trace ket dua kadagiti kabrangayan na ti nagpositibo nga isuda IN-C1286 ken INC1287.
Inbatad na a manarimaan metten ti contact tracing kadagiti nakapulapol dagiti dua a pasyente iti barangay da.
