LAOAG CITY – Saan a pinalubusan dagiti kameng ti PNP-Sinait ni Barangay Kagawad Melvin Coloma iti Barangay Pusol iti ili ti Pinili a simrek iti Sinait, Ilocos Sur tapno mapan na koma sukunen ti kasinsin na a naospital kalpasan a naalisan.
Immunan nga inbatad Barangay Chairman Mario Tugawen iti Barangay Pusol iti ili ti Pinili nga uray idi napanda intaray iti ospital iti ili ti Sinait ti kaanakan ni Coloma ket dandani saan a pinalubusan ida dagiti kameng ti PNP-Sinait nga agisaysayangkat ti checkpoint iti lugar.
Daytoy ket gapu ta ti inbaga da kadakuada ket masapol nga iti ospital ditoy probinsya ti panangipanan da iti pasyente da.
Nupay kasta, kuna ni Tugawen a nakisarita da nga as-asideg iti ospital iti ili ti Sinait a pangitarayan dan iti nasao a pasyente ket pinalubusan met laeng ida dagiti kameng ti PNP.
Kabayatanna, nagpadespensar ni Police Lt. Joel Idica, ti chief of police iti ili ti Sinait iti inaramid dagiti adda iti babaen na, ken inpasingked na a kasarita na dagitoy a masapol a kitaen da a naimbag dagiti dumaldalyasat tapno saanen a maulit ti napasamak.
Maipalagip a naiget ti maipatpatungpal a checkpoints iti intero a Luzon tapno makita a naimbag dagiti sumsumrek ken rumrumuar iti bukod a lugar gapu iti agtultuloy a panagngato ti kaso ti covid-19 ditoy pagilyan.
