LAOAG CITY – Nasakit ti nakem ni Barangay Kagawad Augustus Primero ti Brgy. Parparuroc iti ili ti Vintar ken ni Barangay Chairman Joviejone Refelio kalpasan a maipagarup a saan a napintas ti pannakisarsaritana kenkuana.
Segun kenkuana, nagpakada isuna ken ni Kapitan Refelio nga ag-leave daytoy iti uneg ti innem nga aldaw gapu ta mapan idiay Manila.
Inbatadna a saanna met a ninamnama nga awan ti nag-duty a barangay official kabayatan nga awan isuna.
Gapu iti daytoy, inlawlawagna nga idi timmawag ti Kapitan kenkuana ket maipagarup a nagsasao ti saan a nasayaat a sarita.
Mainaig iti daytoy, inpasingked ni Kagawad Primero a nakasagana isuna a sumango iti Department of the Interior and Local Government no bilang adda ti nalabsingna a pagannurotan kas maysa nga agserserbi iti gobierno.
Kabayatanna, iti panagturong ti Bombo Radyo Laoag News Team ken ni Kapitan Refelio ket kalikagumna a makasarita ita a malem ni Kagawad Primero tapno saanen a dumakkel pay ti nasao nga isyu.
