LAOAG CITY – Balligi ti naiyuswat a drug buy-bust operation babaen iti nagtipon a pwersa ti PNP ken PDEA iti Barangay 25 ditoy ciudad ti Laoag.
Nabigbig ti subject ti operasyon a ni Mark Jay Ramos, agtawen ti 20 ken residente iti nadakamat a barangay.
Nakumpiskar manipud kenni Ramos ti maysa a dakkel a sachet ti maipagarop a napagango a bulong ti marijuana ken maysa a kalibre 38 a paltog nga addaan ti tallo a bala a naipan iti sling bag, sabali pay ti dua a sachet iti isu met laeng a maatap a marijuana a naipan iti karton ti cellphone, ken ti buybust money ket 10 a ribo a pisos no sadinno ket walo ribo ti boodle money.
Ti nakumpsikar kenni Ramos ket agdagsen amin ti kagudwa a kilo ken agbalor ti 50 a ribo a pisos.
Naamoan a ni Ramos ket maibilang nga High Value Indibidual iti Drug Watchlist ti PDEA.
Mainaig iti daytoy, nagkedked met ni Ramos a mangipaay ti komento seknan iti pannakatiliw na.
Kabayatanna, kuna ni Barangay Chairman Victor Flores a nadagsen iti rikna ti pannakatiliw ni Ramos nangruna ket kalkalikagoman na a maideklara kuma a drug-cleared ti barangay da.
Segun kenni Flores, awan ti namonmonitor na nga adda ti iligal nga aktibidad ni Ramos, ken ti ammo na laeng ket agin-inom ti nasanger.
