Maminsan manen a tumabuno ni Kai Sotto kadagiti mini camps idiay America tapno matungpalna ti arapaapna nga agay-ayam iti National Basketball Association.
Awan ti eksakto a detalye no kaano ken no ania a team ti pakipagpasetan ti Filipino player.
Inbatad ni Wasserman Sports executive Tony Ronzone a maplastar ti amin tapno maipakita manen ti 7-foot-3 a Pinoy cager ti kinalaingna iti sango dagiti coaches ken trainers ti National Basketball Association.
Iti agdama, adda ni Sotto ditoy Pilipinas kalpasan ti kampaniana iti Yokohama B-Corsairs iti Japan B.League.
Kalpasan ti sumagmamano nga aldaw a panaginana, dagus a mapan ni Sotto idiay America tapno ag-training camp tapno masiguradona a nasayaat ti kasasaadna sakbay a makipaset kadagiti mini camp ti National Basketball Association.
Maipalagip nga idi napan a tawen, nakipaset ni Sotto kadagiti mini camp dagiti nadumaduma a team ti National Basketball Association.
