LAOAG CITY – Inpakaamo ti maysa a kalesa operator ditoy siudad ti Laoag iti Bombo Radyo a malukswa gapu iti pannakakissay ti premyo da iti parada dagiti kalesa idi Disyembre 2020.
Segun iti operator, napagsasaritaan da iti taripnong nga inorganisar ti Tourism Office ditoy siudad ti Laoag sakbay ti parada a 4,500 a pisos ti maited a consolation price.
Nu pay kasta, inbatad na nga idi naawat da ti premyo idi biyernes ket nagbalin a 10,000 pisos ti inabak da.
Kabayatanna, inpakaamo ti operator a dagus metlaeng nga inbaga ti presidente iti asosyan da a masapol a maikkat ti 5,500 tapno maited iti Tourism Office ken maigatang ti pinta a mausar kadagiti kalesa.
Gapu iti daytoy, 4,500 laeng ti nagbati kadakuada a consolations winner.
Kalikagum ti nasao a kalesa operators a malawlawagan ti inaramid ti presidente nu pudno metlaeng a naited daytoy iti tourism office wenno saan.
Patien na a nu mandar a mismo ti tourism office ti pannakakissay ti premyo da ket adda kuma ti panawagan ti opsina a taripnong kadakuada nga operators ti kalesa.
Iti mainaig a damag, inlawlawag ni Mr. Randy Domingo, presidente ti asosasyon dagiti agkalkalesa ditoy siudad ti Laoag ti nakaipanan ti naikissay manipod iti inawat a premyo dagiti operators iti naglabas a parada dagiti kalesa idi Disyembre 2020.
Segun ken ni Domingo, inyuman na iti tourism office ditoy siudad partikular ti pannakakissay ti premyo dagiti operators ken inbaga na a napatgan daytoy.
Inbatadna a ti 5,500 a naikkat manipod 10,000 a naawat dagiti consolation winners ket mausar a paggatang ti pinta.
Inkalintegan na a saan a panagabuso ti addang na wenno ti pannangdesisyonna a mangkissay ti premyo dagiti operators gapu ta kalikagum na laeng a papintasen dagiti kalesa ti asosyan da ken tapno agpapada dagitoy.
Innayun na a sakbay nga inikkatanna ti premyo dagiti maseknan ket immanamong dagiti operators.
Kabayatanna, inpakaamo ti toursim office nga awan ti naikiddaw wenno pinatgan ti opisina a pannakakissay ti naited a premyo dagiti kalesa operatos ditoy siudad.
