LAOAG CITY – Naiyuswat ti search operation iti balay ni Mr. Albert Balbas iti Barangay 23 ditoy ciudad ti Laoag.
Ti nasao a search warrant ket aggapo iti Regional Trial Court Branch 70 idiay probinsya ti Pangasinan babaen ti panagaplikar ti Regional Intelligence Division iti PNP-Region I.
Naamoan a ni Balbas ket tao ti maysa a kandidato ditoy probinsya ken awan iti balay da iti pannakaisayangkat iti operasyon.
Inbatad ti abogado ni Balbas a ni Atty. Juanito Antonio a masdaaw no apay nga aggapo pay laeng ti search warrant idiay probinsya ti Pangasinan idinto a mabalin da met ti nagaplikar idiay probinsya iti Ilocos Sur nga as-asideg ditoy probinsya.
Nakakumpiskar dagiti otoridad iti maysa a kalibre 45 a paltog ken 21 bala ti nasao a paltog a nakaikabil iti tallo a magazine iti balay da Balbas.
Adda ti naipakita a lisensya ti paltog ni Balbas ken permiso a mabalin nga agikot ti paltog ngem iti panangberipikar ti PNP iti camp crame ket naamoan nga awan ti nagan na kadagiti gun holders.
Nupay kasta, inbatad ti PNP nga uliten da nga iberipikar no adda wenno awan ti nagan ni Balbas iti camp crame kas gun holder.
Gapu ti daytoy, kinumpiskar latta dagiti kameng ti PNP dagiti ebidensya tapno adda ti pammaneknek nga inyimplementar da ti search warrant operation.
Agamak pay ti PNP amangan no dagitoy ti madaksan no saanda a kinumpiskar dagiti ebidensya kontra ken ni Balbas.
