LAOAG CITY – Inpakaammo ni Sang. Panlalawigan Member Jonathan Torralba, ti Chairman ti Committee on Agriculture, Cooperatives and Livelihood a saan a matuloy ti pannakaipatungpal ti kalikagom da a maymaysa ti presyo ti karne ti baboy ditoy probinsya.
Daytoy ket gapo ta basar iti legal officer ti probinsya ket saan a mabalin a mangputar ken mangipatungpal ti Panlalawigan ti ordinansa seknan iti daytoy a banag.
Malaksid iti daytoy, kunana a saan a kayat ti lokal a gobierno ti ciudad ti Laoag nga agingga laeng iti 100 a pisos ti inayun dagiti meat vendors manipud iti presyo a pananggatang da iti live weight.
Segun kenni Torralba, gapo iti daytoy ket inpakammo na metten kenni Gov. Matthew Marcos Manotoc ti nasao a banag ken inbaga kenkuana ti gobernador nga isuna ti makisarita kadagiti amin a mayor ditoy probinsya.
Innayon na a ti inbaga kenkuana ti gobernador a dagiti maseknan a mayor ti agaramid ti Executive Order a mangikedkeddeng iti presyo ken mamonitor daytoy.
Ummuna iti daytoy, naiyuswat ti public hearing seknan iti daytoy a banag nga inatendaran dagiti hog raisers, meat vendors ken dagiti agideldeliver ti frozen meat ditoy probinsya.
Kabayatanna, maragsakan ni Sang. Panlungsod Member Jason Perera ditoy ciudad ti Laoag nga immanamong ti Sang. Panlalawigan iti takder na seknan iti pannakaiyetnag ti maymaysa a presyo ti karne ti baboy ditoy Ilocos Norte.
Segun kenni Perera, saan a rumbeng a ti legislative ti mangiyetnag ti presyo kadagiti produkto gapo ta maibilang dagitoy a free enterprise.
Inbatad na a ti laeng Kongreso ti addaan ti bileg a mangiyetnag ti presyo ti presyo ti baboy ken ti lokal a gobierno ket isu laeng ti mang-regulate ti preparation and sale, saan ket a ti presyo.
Kunana a gapo ta saanen a matuloy ti pannakapagbalin a maymaysa ti presyo ti karne ti baboy ditoy probinsya ket mangbwangay ti lokal a gobierno ti ciudad ti Price Monitoring Council.
Kalikagom na pay a ti ciudad ti Laoag ti ummuna ken mangidaulo iti kastoy nga aramid ken sumurot ti dadduma nga ili ken ciudad.
Naamoan a ti mabukel a Price Monitoring Council ket isu ti mangmonitor iti presyo ti karne ti baboy ken live weight tapno saan a magundawayan.
