LAOAG CITY – Umad-adu dagiti probinsia a mangisaysayangkat ti “benchmarking” iti Ilocos Norte.
Daytoy ket pakairamanan ti probinsia ti Misamis Oriental nga indauloan a mismo ni Gob. Peter “Sr. Pedro” Unabia.
Kinadua ti gobernador dagiti sangapulo ket lima a mayor department heads ti nadakamat a probinsia ken dagiti sumagmamano a kameng ti Sangguniang Panlalawigan.
Mainaig iti daytoy, inlawlawag ti gobernador a maymaysa laeng ti rason iti panangpilida ditoy probinsia a nangisayangikatan iti “benchmarking” ken daytoy ket iti tarigagayda a manglaban iti kinakurapay.
Impalgakna a kangrunaan a daydayawenda iti Ilocos Norte ket ti kinababa ti “poverty rate”.
Inbatadna nga adayo ti paggidiatan ti “poverty incidence” ti probinsia nga uppat laeng a porsiento idinto a duapulo ket tallo a porsiento a kaibatugan ti nasursurok ngem tallo gasut a ribu dagiti nakukurapay nga umili idiay Misamis Oriental.
Ginutigotna dagiti inkuyogna nga opisial kangrunaanna kadagiti mayor a dumngeg a naimbag tapno daytoy ti ipakatda kadagiti bukodda a lugar.
Immanugot ni Unabia a dakkel a karit para kadakuada no kasano a maipababa ti bilang dagiti nakukurapay iti Misamis Oriental.
