LAOAG CITY – Manamnama nga aramiden ti Department of Public Works and Highways a kongkreto ti kalob dagiti baro a kanal ditoy ciudad ti Laoag nangruna iti paset ti Rizal St. ditoy ciudad.
Daytoy ti inbatad ti Sang Panlungsog ditoy ciudad ti Laoag.
Inpakaammo ti konseho nga addan ti sungbat ti Department of Public Works and Highways maipanggep ti kalob dagiti kanal a saan a kayat a pagnaan dagiti motorista gapu ta daytoy ket naaramid iti metal.
Patien ti dadduma a motorista a saan a natalged a pagnaan ti lugar gapu ta ti dadduma a pasetna ket awan ti asphalt overlay na isut gapuna a nangatngato pay ti kalob ti kanal ngem ti mismo a kalsada.
Segun iti konseho, inpanamnama ti Department of Public Works and Highways a daytoy ti isaruno da nga aramiden.
Inlawlawag ti nasao a departamento a saan da a naaramid iti panagfiesta ti ciudad ti Laoag gapu iti kaado dagiti tattao.
