LAOAG CITY – Temporario a napaserraan ti kalsada iti Brgy. Pila ditoy siudad ti Laoag.
Segun ken ni Brgy. Chairman Robert Jose iti nasao a barangay, daytoy ket kalpasan nga adda ti nakita a nadadael a paset iti rangtay a pagdalyasatan dagiti motorista.
Gapu iti daytoy, kunana a dagusda nga inkiddaw iti Department of Public Works and Highways ti pannakailatang ti pundo tapno dagus a matarimaan ken mapasayaat ti maibilang a busy road.
Inlawlawagna nga idi damo ket mapalubusan pay laeng dagiti motorista a makadalyasat iti nasao a kalsada ngem gapu iti saanda a panangsurot iti traffic lights ket napagnunumoanda pakairamanan ti kontraktor ken ti Department of Public Works and Highways a maminpinsan a maparikepan laengen ti kalsada kabayatan a maiyur-uray ti curing period daytoy.
Inbatadna nga adda ti naiyuswat a panagtataripnong kaduana dagiti maseknan a padana a Kapitan iti dadduma a barangay maipanggep daytoy a banag.
Kunana nga agpaut ti 21 nga aldaw sakbay a maipalubos a malukatan ti kalsada ngem tinawaganna ti kontraktor no mabalinen a mailukat inton bigat ngem nakadepende pay laeng ti agbalin a situasion ti rangtay.
Immuna iti daytoy, adda ti reklamo dagiti sumagmamano a motorista a marigatanda nga aglikus a dumalyasat iti sabali a barangay gapu iti sumagmamano a lawasen a nakarikep ti nadakamat a kalsada.
