LAOAG CITY – Kinumpirmaran ni Police Capt. Eduardo Santos, ti chief of police iti ili ti Pagudpud a saan a madalanan ti kalsada iti asideg ti “Paraiso ni Anton” iti Barangay Pancian ti nasao nga ili.
Daytoy ket kalpasan a nagaburan ti daga kalpasan ti napasamak a landslide iti nadakamat a lugar a gubuay ti panagtudtudo na ti napigsa.
Kuna na a malaksid ti napigsa a tudo ket napigsa pay ti angin nga arigna na adda ti bagyo na iti nasao nga ili.
Inbatad ni Santos a sibubukel a kalsada ti nagaburan isut gapuna nga awan pay laeng ti makadalyasat a lugan.
Gapu iti napasamak, ado dagiti lugan a naistranded ken nagpatpatnag da iti lugar.
Segun kenkuana, ituloy da ti clearing operation ita a bigat tapno mawaknitan ti kalsada.
