LAOAG CITY – Kinumpirmaran ni Mr. Hendrick Pedronan, mangidadaulo ti Municipal Disaster Risk Reduction and Management Office (MDDRMO) iti ili ti Pagudpud nga adda ti kalsada iti Baragay Pancian a saanen a madalyasatan gapo iti panagreggaay ti daga.
Segun kenni Pedronan, arig na nagtriple ti landslides a napasamak idi kalman.
Inlawlawag na nga itay bigat ken nangiyuswat da ti clearing operation ngem gapo ta agtultuloy latta ti panagregaay ti daga ket nabalakadan dagiti personnel nga agsardeng pay laeng gapo ta delikado para kadakuada.
Inbatad na nga umabot iti 30 agingga iti 50 a metro ti kalawa ti apektado ti dalan gapo iti landslide gubuay ti panagtudtudo.
Gapo iti daytoy ket uray anya a klase na a lugan ket saan a makadalyasat ken arig na maysa a bantay ti addan iti tengnga ti kalsada.
Mainaig iti daytoy, kuna ni Pedronan nga ado dagiti na-stranded a motorista pakairamanan dagiti trucking wenno delivery truck.
Kunana a no agtultuloy latta ti tudo a mapasaran ti nasao nga ili ket saan a maibaga ni Pedronan no kaano a malukatan ti dalan ngem no sumayaat ti panawen ket umabot iti dua nga aldaw sakbay a mawaknitan ti kalsada.
Kabayatanna, kuna ni Pedronan a nasurok sangaribo a pamilya ti naapektaran ti panaglayos ken dua ti naibakwit a pamilya manipud iti Barangay Burayoc.
