LAOAG CITY – Saan a tuloy-tuloy ti panagdalyasat dagiti lugan iti kalsada a paset ti Barangay Pancian, Pagudpud Ilocos Norte gapu iti panagregaay ti daga nga ituntunda pay laeng ti Bagyo Carina.
Daytoy ti inpakaammu ni Barangay Chairman Jessie Cris Lagundino iti nasao a barangay.
Kunana a no maiyanud ti daga nga aggapu iti kabanbantayan ket mangitunda ti pannakabarado iti kalsada, ket no adda pay napigpigsa tudo ket masapul a maminpinsan a maparikeppan daytoy.
Nu pay kasta, inpasigurado met ni Lagundino a naka-standby dagiti kontraktor, dagiti kameng ti Department of Public Works and Highways (DPWH), ken local government units tapno mamonitor latta ti area.
Kabayatanna, nagpalagip daytoy kadagiti amin a motorista nangruna dagiti agbiyahe nga agturong ken rumuar nga agpa-amianan ditoy probinsya.
