LAOAG CITY – Inpakaammo ni Barangay Chairman Jessie Cris Lagundino, ti Barangay Pancian iti ili ti Pagudpud a narisgo a pagdalyasatan ti kalsada iti paset ti Manila North Road iti Sitio Banquero iti Barangay Pancian iti ili ti Pagudpud gapu kadagiti agtennag a batbato.
Inbatadna a daytoy ket gapu pay laeng iti agtultuloy a mapaspasaran a panagtudtudona rason nga adda ti danum nga agayos manipud iti ngato ti bantay pakairamanan dagiti matmatnag a batbato.
Inlawlawagna nga adda ti apagapaman nga immirot ti taray ti trapiko gapu iti naiwayat a clearing operation iti kalsada.
Nupay kasta, kunana a saan met unay a nabayag a na-stranded dagiti dumalyasat a motorista.
Innayonna nga agtultuloy ti panangmonitor ti lokal a gobierno ken ti Department of Public Works and Highways iti nasao a kalsada tapno maipasigurado ti kinatalged dagiti motorista.
