LAOAG CITY – Kinumpirmaran ni Mr. Elmer Guimod, residente iti Barangay Payak iti ili ti Bangui a narisgo ti kalsada iti paset ti Barangay Banban a madalan da nga agturong iti lugar da.
Daytoy ket gapo ta nagalis ken adda ti paset nga adda ti nagabut wenno limseb iti lima a pulgada gapo iti panagtudtudo iti nasao nga ili.
Segun kenni Guimod, adda ti rikki ti kalsada a batog ti agregreggaay ken no agtultuloy ti panagtudtudo na ket mabalin a kumaro ti sitwasyon.
Inbatad na a no adda ti dumalan a dadakkel ken nadadagsen a luglugan ket mabalin a kumaro ti panaglisseb na ken lumukneng ti daga.
Naamoan nga addan ti uppat nga aldaw a mapaspasaran da ti tudtudo iti nadakamat nga ili.
Kabayatanna, kuna ni Guimod a naipakammo nan daytoy iti MDRRMO iti nasao nga ili.
