LAOAG CITY – Inaprobaran ti House of Representatives ti House Bill No. 8042 wenno ti National Food Security Day Act a mangikeddeng ti Oktubre 16 kas tinawen a pananglagip iti kinapateg ti seguridad iti taraon.
Inbatad ni House Majority Leader Ferdinand “Sandro” Marcos, inaprobaran ti gakat ti 248 a butos a pabor, zero negative ken maysa nga abstention.
Gagem ti gakat nga agtultuloy a mapagtalinaed iti agenda ti gobierno ti laban kontra iti panagbisin ken nangato a presio ti taraon, manipud iti produksion kadagiti kataltalonan agingga iti husto a nutrision ken panangkissay ti sayang a taraon.
Madutokan ti Department of Agriculture kas lead agency iti tinawen a panangselebrar, kabinnulig ti Department of Education, Commission on Higher Education, Department the Interior and Local Government, National Nutrition Council ken dadduma pay nga ahensia tapno maipadanon kadagiti pagadalan, komunidad ken dadduma pay nga stakeholder iti food system.
Karaman iti pammilin ti panangdisenio kadagiti programa ken kampania para iti seguridad iti taraon, bukud a produksion, agrikultura, nutrision ken panangipateg kadagiti mannalon ken mangngalap.
Kasapulan a mangiparuk-at ti Department of Agriculture ti implementing rules iti uneg ti 60 nga aldaw manipud iti panangipatungpal ti linteg.
Inbatad ni Majority Leader Marcos, ipakpakita ti alisto a panangaprobar ti Kamara de Representantes ti disiplinado a panagtrabaho kadagiti komite ken plenario iti babaen ti liderato ni Speaker Faustino “Bojie” Dy III a gagem a protektaran dagiti pamilia a Pilipino ken papigsaen ti food system.
