LAOAG CITY – Ilunglungalong ni House Committee on Good Government and Public Accountability Chairman Joel Chua ti panangbukel ti maysa a gakat a mangregulate ken mangsigurado iti usto a panaggastos ti confidential funds.
Iti maikapat a panagdengngeg ti komite mainaig iti maipagarop a saan nga umiso a panangusar ti confidential funds ti Office of the Vice President, inpetteng ni Chua a nagbalin a nalawag iti imbestigasyon nga alisto a maabuso ti nasao a pondo no nalukay unay dagiti pagannurutan.
Inpaganetget na a panawenen tapno palawaen ti auditing powers ti Commission on Audit iti confidential funds para iti beripikasyon ti aktuwal a panaggastos iti daytoy, saan laeng a supporting documentation.
Inkalintegan ni Chua a limitado laeng ti Commission on Election iti panagberipikar no kompleto ti dokumento ken saanen a dumalan iti assessment ti authenticity.
Ti inlungalong a gakat ti kongresista ket namonganay iti maipagarop a makaalarma a “pattern” a naibutaktak iti imbestigasyon ti komite.
Kabayatanna, inpetteng ti chairman ti komite a saan pay a nalpas ti panagimbestigar da gapu ta ado pay dagiti nasken a bukitkitan da maipanggep iti kwestyunable a confidential funds ti Office of the Vice President ken ipursige nga ipatungpal ti transparency ken accountability iti panagusar ti pondo ti gobyerno.
