LAOAG CITY – Kalikagum ti Kamara de Representantes nga aprobaran iti maikatlo ken maudi a pannakaibasana ti gakat a 2025 national budget nga aggatad ti P6.352 trilyon sakbay ti umuna a recess ti 19th Congress inton Setiembre 25.
Segun ken ni House Committee on Appropriations Senior Vice Chairperson ken Marikina City Rep. Stella Luz Quimbo, mangrugi inton Lunes ti bigat, Setiembre 16, ti deliberasion ti plenario iti mailunglungalong a pundo.
Umuna a maidasar ti general principles nga isu ti pangibasaran iti panangbukel ti National Expenditures Program.
Saan a kas ti deliberasion ti komite, kuna ni Quimbo a saanen a direkta a makasungbat dagiti opisial ti ahensia kadagiti saludsod dagiti agpanpanday linteg imbes a dagiti kongresista nga sponsor ti budget-da ti mabalin a sumungbat para kadakuada.
