LAOAG CITY – Agtaripnong ita a bolan da House Speaker Martin Romualdez ken Senate President Chiz Escudero tapno plansaen ti aniaman a saan a pagkinnaawatan ti dua a pagpandayan linteg iti kongreso.
Iti agdama, rinugyanen ti kamara de representantes ken ti senado ti koordinasyon da para iti legislative priorities da, sakbay ti maikatlo ken maudi a regular a sesyon ti 19th Congress.
Inbatad ni Speaker Romualdez a naikkan da ti gundaway a nagsarita ken ni Escudero a ti immuna a trinatar na ket ti common legislative agenda ti dua a pagpandayan linteg iti kongreso.
Kuna na pay a nagtulag da ken ni Senate president Escudero a sakbay ti Legislative Executive Development Advisory Council (LEDAC) meeting iti maikatlo a lawas ita a bolan ket makapagsarita dan a naimbag.
Innayon na nga adda met ti bukod a koordinasyon da House Majority Leader Jose Manuel Dalipe ken ti counterpart na iti Senado a ni Sen. Francis Tolentino.
Kuna pay ni Speaker Romualdez nga ammo ni Escudero ken dadduma pay a mangidadaulo iti Senado a naipasan ti Kamara de representantes dagiti amin a priority measures ni Presidente Ferdinand Marcos Jr. ken ti Legislative-Executive Development Advisory Council (LEDAC).
Inpalgak ni Romualdez a nga ur-urayen da laengen kadagiti kakadwa na iti kamara de representantes no ania ti iprayoridad a tutukan ti senado kadagiti inpasa da a gakat.
